ކޮރަޕްޝަނުގެ ސަބަބުން މުޖުތަމަޢުގެ އިޖުތިމާއީ ފޭރާން ވީދި، ތަރައްޤީއަށް ހުރަސްއެޅޭ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
އެންޓި ކޮރަޕްޝަން ލޯ އެންފޯސްމަންޓު އޭޖެންސީޒް އިން ދަ އޯއައިސީ މެންބަރު ސްޓޭޓްސްގެ 02 ވަނަ މިނިސްޓަރުންގެ ބައްދަލުވުމުގައި ވާހަކަ ދައްކަވަމުން މިނިސްޓަރ ވަނީ ކޮރަޕްޝަނާ ދެކޮޅަށް ކުރާ މަސައްކަތުގައި އައު އީޖާދުތަކާއި ޓެކްނޮލޮޖީއަކީ މުހިންމު ވަސީލަތެއް ކަމަށް ވިދާޅުވެފައެވެ.
މިނިސްޓަރ ވިދާޅުވީ ކޮރަޕްޝަނާ ދެކޮޅަށް ކުރާ ހުރިހާ މަސައްކަތެއްގައިވެސް ރާއްޖެ ދެމިއޮންނާނެ ކަމަށާއި ދެމެހެއްޓެނިވި ތަރައްޤީ ހޯދުމަށާއި، ރައްޔިތުންގެ ދުޅަހެޔޮކަން ޙިމާޔަތްކުރުމަށްޓަކައި، ކޮރަޕްޝަނާ ދެކޮޅަށް މަސައްކަތްކުރައްވާނެ ކަމަށެވެ.
"މިމަސައްކަތަކީ ވަރަށް މުހިންމު މަސައްކަތެއްކަން އަޅުގަނޑުމެން އެންމެން ޤަބޫލުކުރަން .އެހެންނަމަވެސް، އަޅުގަނޑުމެންގެ ޤައުމުތަކުގެ މެދުގައި ހަރުދަނާ އެއްބާރުލުމެއް ލިބިގެން ނޫނީ، މިމަސައްކަތް ކާމިޔާބެއް ނުކުރެވޭނެ .އޯ.އައި.ސީއަކީ ކޮރަޕްޝަން ހުއްޓުވުމުގައި ބެސްޓް ޕްރެކްޓިސްތައް ޙިއްސާކުރުމަށް އޮތް ބާރުގަދަ ޕްލެޓްފޯމެއް. ވަޒީރު އިޙްސާން"
މިނިސްޓަރ ވަނީ މިކަމުގެ ސަބަބުން ސަރަހައްދީ ގުޅުންތައް އުފެދި، މުއައްސަސާތައް ހަރުދަނާކޮށް، ކޮރަޕްޝަން ހުއްޓުވުމަށް ހުރި ގޮންޖެހުންތަކަށް ހައްލު ލިބިގެންދާނެ ކަމަށްވެސް ވިދާޅުވެފައެވެ.
ކޮރަޕްޝަނުގެ ސަބަބުން މުޖުތަމައުގެ އިޖުތިމާއީ ފޭރާން ވީދި، ތަރައްގީއަށް ހުރަސްއެޅުމުގެ އިތުރުން ވެރިކަން ބަލިކަށިވެގެންދާކަން ފާހަގަކުރައްވައި، މިނިސްޓަރ ވިދާޅުވީ މުސްލިމު ގައުމުތައް އިސްލާމީ އަޤީދާއިން ލާޒިމުކުރާ ގޮތަށް ހާމަކަން ބޮޑު، އަދުލު އިންސާފުވެރިކަމާއި އިތުބާރުގެ މައްޗަށް އުސޫލުތައް ދެމެހެއްޓުމަކީ ވާޖިބެއް ކަމަށެވެ.
އެގޮތުން ހުރިހާ ފަންތިއެއްގައިވެސް ކޮރަޕްޝަނާ ދެކޮޅަށް މަސައްކަތް ކުރުންމަތީ ރާއްޖޭން ދެމި އޮންނާނެ ކަމުގެ ޔަގީންކަން މިނިސްޓަރ ވަނީ މި ބައްދަލުވުމުގައި ދެއްވާފައެވެ.
އެހެން ނަމަވެސް ޤައުމުތަކުގެ މެދުގައި ހަރުދަނާ ގޮތެއްގައި އެއްބާރުލުން ނުލިބި، މި މަސައްކަތް ކާމިޔާބު ނުކުރެވޭނެކަންވެސް މިނިސްޓަރުގެ ވާހަކައިގައި ފާހަގަކުރެއްވިއެވެ.
މީގެ އިތުރުން މިނިސްޓަރ ވަނީ އެންޓި ކޮރަޕްޝަން ކޮމިޝަނާއި ސަޢޫދީ ޢަރަބިއްޔާއާ ގުޅިގެން، އަންނަ އަހަރުގެ މެއި މަހުގެ 6 އިން 7 އަށް ރާއްޖޭގައި ބޭއްވުމަށް ހަމަޖެހިފައިވާ "ފަތުރުވެރިކަމުގެ ދާއިރާގައި އިންޓެގްރިޓީ އިތުރުކުރުން" ގެ ނަމުގައި ބާއްވާ ޖޮއިންޓް އިންޓަރނޭޝަނަލް ފޯރަމަށް މެންބަރު ހުރިހާ ޤައުމުތަކަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ނަންފުޅުގަ ދަޢުވަތު އަރުވާފައެވެ.