ހދ. ކުމުންދޫގައި އިމާރާތްކުރާ ފުލުހުންގެ މަރުކަޒުގެ ޢަމަލީ މަސައްކަތް ފަށައިފިއެވެ.
ފުލުހުންގެ މަރުކަޒުގެ ޢަމަލީ މަސައްކަތް ރަސްމީކޮށް ފަށްޓަވާފައިވަނީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ކުމުންދޫގައި މިއަދު ބޭއްވި ރަސްމިއްޔާތުގައެވެ.
މި ރަސްމިއްޔާތުގައި ފުލުހުންގެ މަރުކަޒުގެ ބިންގާ އަޅުއްވައިދެއްވީ ދާޚިލީ ސަލާމަތާއި ފަންނިއްޔާތާއި ބެހޭ ވަޒީރު ޢަލީ އިޙްސާންއެވެ. އަދި އަރިހުގައި ކޮމިޝަނަރ އޮފް ޕޮލިސް އިސްމާޢިލް ނަވީން އާއި، އެމްޓީސީސީގެ ސީއީއޯ އަދި މެނޭޖިންގ ޑިރެކްޓަރު އަޙްމަދު ސައުދީ އާއި ކުމުންދޫ ކައުންސިލްގެ ރައީސް އަމީނު މުޙައްމަދުގެ އިތުރުން އެ ދާއިރާގެ ރައްޔިތުންގެ މަޖިލީހުގެ މެމްބަރުވެސް ބައިވެރިވެވަޑައިގެންނެވިއެވެ.
މިއީ އެމްޓީސީސީއާ ހަވާލުކޮށްގެން ކުރިއަށް ގެންދާ މަޝްރޫޢެކެވެ.
މިއީ ރާއްޖޭގެ މީހުން ދިރިއުޅޭ ހުރިހާ ރަށެއްގައި ފުލުހުންގެ ޚިދުމަތް ފުޅާކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ސިޔާސަތުގެ ދަށުން ފަށްޓަވާފައިވާ މަޝްރޫޢެކެވެ.
މި ސިޔާސަތުގެ ދަށުން ރާއްޖޭގެ ކޮންމެ ރަށަކީވެސް ކޮންމެވެސް ފެންވަރެއްގައި ފުލުހުންގެ ޚިދުމަތް ޤާއިމުވެފައިވާ ރަށްތަކެއްގެ ގޮތުގައި ހެދުމަށް ސަރުކާރުން އަންނަނީ މަސައްކަތްކުރަމުންނެވެ.
އެގޮތުން ފުލުހުންގެ ޚިދުމަތް ގާއިމުވެފައި ނެތް ކޮންމެ ރަށެއްގައި ވެސް މި އަހަރުގެ ނޮވެމްބަރު މަހުގެ ނިޔަލަށް ފުލުހުންގެ ހިދުމަތް ގާއިމުކުރުމުކީ ވެސް ސަރުކާރުގެ އަމާޒެކެވެ. މި ޕްރޮޖެކްޓާ ގުޅޭގޮތުން ވަޒީރު އިޙްސާން ވިދާޅުވެފައިވަނީ މިހާރު ގާއިމުކުރަމުންދާ ފުލުހުންގެ މަރުކަޒުތަކުގައި ރީޖަނަލް ހެޑްކުއާޓަރުތަކާއި އަތޮޅު ފެންވަރުގެ މަރުކަޒުތަކާއި ފުލުހުންގެ ތަމުރީނުތައް ދިނުމަށް ޚާއްސަ ބަޔަކާއި ކުށް ކުރާ ފަރާތްތައް ހައްޔަރުކޮށް ބައިތިއްބަން ޚާއްސަ ސެލްތައް ގާއިމުކުރެވިގެންދާނެ ކަމަށެވެ.
މީގެ އިތުރުން، ވެހިކަލެއް ޓޯކުރަންޖެހޭ ހާލަތުގައި ވެހިކަލް ޓޯކޮށް ބަހައްޓާނެ ތަންތަނާއި ފުލުހުންގެ ވެހިކަލްތަކަށް މައްސަލައެއް ދިމާވެ، މަރާމާތުކުރަންޖެހޭ ހާލަތްތަކުގައި އެކަން ކުރެވޭނެގޮތަށް ހާއްސަ ތަނަކާއެކު ފުލުހުންގެ މަރުކަޒުތައް ގާއިމުކޮށް އަދި އާބާދީ ބޮޑެތި ރަށްރަށުގައި ގިނަ ފުލުހުން ތިބެގެން ދެވޭނެ ފަދަ ހިދުމަތެއް ގާއިމުކުރާގޮތަށް ފުލުހުންގެ އިންފްރަސްޓްރަކްޗަރ ތައްޔާރުވެފައި އޮތް ކަމަށް ވަޒީރު ވިދާޅުވެފައިވެއެވެ.
ހަމަ އެހެންމެ، މުޖުތަމައުގައި އަމަންއަމާންކަމާއި ސުލްހަ މަސަލަސްކަން ދެމެހެއްޓުމަށް ކުރަމުން އަންނަ އެންމެ ބޮޑު މަސައްކަތަކީ އަތޮޅުތެރޭގައި މީހުން ދިރިއުޅޭ ކޮންމެ ރަށެއްގައި ފުލުހުންގެ ހިދުމަތް ގާއިމުކޮށްގެން ފުލުހުންގެ ޚިދުމަތްދިނުން ކަމުގައި ވެސް ވަޒީރު ޢަލީ އިޙުސާން ދާދި ފަހުން ވަނީ ވިދާޅުވެފައެވެ.